si e pan bota un pe pan foga magua
nta rinka un txoru nta liberta alma
xintadu lapidu na dor d mundo dentu'l mi
ki dan gana soti mon na petu pan rinka kurason
kurason, ku razon, pidin maguadu pan ba nha kaminhu
longi di disgrasia di omi, nta mondu nha mundu
kambadu baxu inpena d sodadi, solidon so ta txusin
ta sakudin, ta tremen ta pidin pan volta pa kasa
nka linha di koz di saia, nen nka padaz di préga-saia
nha pe e dimeu, ma ki ta manda nel e bo,
dentu sukuru ki ta fadigan xintidu pa lua namora seu faxi
pa manhan sedu sol txuputin korpu pan buska nha kutelu
bexu biran seku, nha masan di rostu moda galinha koradu
kantu na ponta trabesa e parsi ku si baldi riba kabesa
koxa rodonda ta da kutornu na kada pasu ke finka
nha odju ta kundunkundun un riba un baxu na si petu
"ah zeka, zeka bu fazen falsia, ah zeka dimeu
be na mundu zeka, nos ku 4 mininu na txon
galu, porku, baka, besta, padja pa tra la rubera
abo na mundu ku rapariga moda polon d'ozorgon"
si boka bira prigu, si lingua bira lanceta
ami dor d mundu sukundin nha burgonha na meiu perna
nka djobi dianti nka djobé tras, fumu fitxadu
ah kanadja, nhas fidjus n'odjeris d longi la tras ta fika
xintidu nba kual kansadu, alma solopadu'l kulpa
kabesa ta dam latxi, ta pilan moda pilon d festa
ah kulpa k nteni kambadu dentu'l mi nka podi kuel
pam larga mudjer d um omi pam pega ku mudjer di mundu
by Johnny Pina
Sem comentários:
Enviar um comentário