Ten sertus mumentus na vida ki bu ten k inguli sapus pa fazi alguen filiz. Ten algun mal nisu??
Nau. Talvez kela seja problema di mundu. Txeu bez ta faltanu dis'sernimentu pa mondu nos orgulhu, i odja mas pa ken ki sta na nos ladu di ki so pa nos propi biku. Ten txeu izemplus pa da, prinsipalmenti en rilason a fe na Deus, na nos, na vida, na kumpanheru. Nos e kapaz di abri boka i nun apisi dizinbrudja un xpreson tipu:"NTA MATAU", asin d sangui friu, kabesa kenti, kabesa friu, sei la, mas d mesmu modu ta faltanu koragi di txeu bez fla :"nta amau", ou tipu "nta purduau", "dja pasa", "KA MESTI BRIGA".
Nu ten na nos vida 24 ora di kada dia, 7 dia pa simana, i nu entantu nu ta atxa penoso pasa un ora, apenas UN ORA ta obi palavra d Deus ki ka e apenas storias inventadus, mas sin motivus i kaminhus di vivi un vida di partilha, di armonia, d irmandadi, di "djunta mo". Sen entra pa ladu riligiozu, palavras proferidus na igreja e apenas i so exsertus di un livru di etika i "boas maneiras", djuntadu ku direitus umanus i entritantu ken ki ta skodji siguil e markadu komu dodu, nosenti, enfin kuzas d boka des mundu iguinoranti i duenti.
Vida pur si so dja e komplikadu, bu ten ki sai, ba skola, ba trabadju, buska kel pon d hj ku manhan, pamo di onti dja kaba, vida d kori, xinta poku, labanta stika kanela fumu ta baza ki nen kor d kamisa bu ka ta odja d ken ki bu pasa nel i inda nu mesti komplikal mas?!?!
Nu mesti klarici nos dia, ilumina nos noti, ragala odju, abri boka ku serteza ma kel k nu papia tudu alguen ta fika kuel na kantu d obidu moda barudju d muzika dipos di sai d diskoteka ta bumbumbum dentu nos kabesa, nu mesti para i odja ma ten mas ka fazenu midjor, ka fazeu di feru, nu kontinua d karni i osu, mortal pa kumpanheru sima Deus fazenu.
Faltanu intendi ma nu sta li pamodi kuza k nu pistadu i nu ten kel dia sertu di intregal, i el e ton poku, ton poku ki e ta kaba ku agu, ku terra, ku lumi, ku gelu, ku fomi, sedi. Sodadi me ta da kabu del, alcool, droga i mas pior as vez un granzinhu d arroz desviadu e suficienti pa tranu el. E so kel um sopru d vida, kel un respirason. pamo nu ka ta gastal na sforsa pa djuda nos sosiedadi kria, ivului, fika mas limpu, mas iluminadu, mas fresku, mas saudavel i mas aptisivel a vida, a amor, a vizinhansa na kurason d kada un?
Klaridadi k nu mesti e na disizon, na rizolvi kuzas d kabesa friu, pidi opiinion d ken k sta d fora pa nu ka inbrudja na lumi i nu sai kemadu, klaridadi na lenbra ma ken k sta na nos ladu me e viventi, ten k kume, ri, VIVI.
É, isso mesmo!! VIVER. NA PAZ E ALEGRIA COM OS IRMÃOS COM QUE DEUS ME PRESENTEOU.
by Johnny Pina
