Xintadu na maskadjon
Di longi ndjobel
Na un sigundu
Agu parin na boka
Ku gana dal kasu
Si koxa rabida
Dentu mi balansia
Nkumel ku odju
Na vontadi peka
Peli dimeu rapia
Xintidu biran largu
Si formozura raganhadu
Prindadu na bentu
Txusin dentu petu
Nha fomi era grandi
Un dizeju laskadu
Kozedu na nha alma
Sen sal di burgonha
Ki tenti nha koragi
Pidin pan pidil
Si e dan nka ta nega
Mi se dan nta toma
Nta mondu se tres palmu
Na sombra di mi
Na txabeta di nos korpu
Stendedu na djangada
Sima seu ku mar
Un di riba otu di baxu
Ta da tornu rapikadu
Na orizonti nos kuadril
By Johnny Pina
