Di dentu pa mundu

Dexa papel madorna na bolsu

i na un kompasu di morna

nha dedu na kaneta susti nha alma

nun gota di medu poku a poku bua

pa lonji di medu di gosta di sunha

trankadu na batuku di nha kurason

txabetadu na un surizu d nha morabeza

lonji di boka mundu ke lanseta

i sen sunha, dexan bua na meiu di tudu

sen nada mas pa skesi, sen nada mas pa buska

pertu di tera di nha sintimentu di volta

so puera di bentu di nha sodadi malgoz

sen sabi undi ki nha pe sa guian

sen morna nen batuku nta bai inguisadu

ma si sangui ferben na luta ku mundu

nhas veias ta grita pa mi trankadu na peli

i sen medu di fika na meiu di nada, luta

ki manhan ka ten vontadi mas oji ten nisisidadi

di labanta kabesa nun luz di txuba, grita

na papel finkadu ku selu di medu ki bai

i skesi dor ki onti dexan na meiu di mi

falsiadu na dos padas ki Deus torna djunta

pa sen medu labanta kaneta i kola na papel

un letra di sodadi di nha batuku

madornadu na goma di nha katxupa di tera

sen tera n'intera nha rostu na luta

i pa nha tera nskrebi un luta di paz

na meiu di matu, di mundu, di tristeza

lapidu na papel nha alma di omi.

by Johnny Pina