Nta buskau asi:
Ku sensia na boka d xintil na bu boka
Ku alma na sensia di mondu na bu ragas
Sima odja kama ora ki sonu dja toman konta
Doxi sima surizu nosenti na rostu mininu
Ku presa di fazi divagar pa ka perdi gostu
Nta mesteu asi:
Serenu moda lua, na nha palmu mon lapidu
Bunita na nhas odjus, na di mundu ka interesa
Ku pe finkadu, sima tambarina na fundu rubera
Onti, oji, mas un bokadu, tudora mudjer di fe
Tristi, kontenti, balenti, nmesteu mudjer
Nta amau asi:
Txeu ki e poku pa kel ki kurason podi
Poku ki e txeu pa nha surizu alegra
Ku sodadi k e sabi pa petu kenta
Ku karinhu ki e kama mornu pa bu deta
Ku paixão ki e fácil pa bu kurason intendi
by Johnny Pina
Sem comentários:
Enviar um comentário